Madalas ko itong naririnig sa aking mga magulang o kung minsan nga ay ng ating mga magulang. Marahil siguro ay sinasabi nila sa atin ito sa atin upang iparating na lahat ng bagay ay may silbi. Siguro rin ay para sabihin na gamitin natin ang mga bagay na ibinigay sa atin ng Diyos, sa tamang paraan.
Tama naman sila. May bibig tayo para makapagsalita. Aminin na natin na minsan ay ginagamit natin ang ating bibig sa maling paraan o minsan naman ay hindi natin ito ginagamit. Naranasan niyo na ba na tinatanong ka ng iyong guro at hindi ka nakapagsalita? O kaya nama'y nakikipagkuwentuhan ka sa iyong mga kaibigan sa napakalakas na boses? Madalas mangyari ito. Baliktad hindi ba? Dapat ay ipahayag natin ang ating mga saloobin at opinyon sa tamang boses o paraan at kapag nakikipagkuwentuhan naman ay yung sapat na boses lang.
Isa pa sa mga sinasabi ng ating mga magulang ang linyang "Ang utak ay para sa pag-iisip". Tama na naman uli sila. Sabi nga sa isang biro, "Kapag ang utak hindi gamit, mahal ito kapag ibinenta." Oo nga. Minsan ay nag-iisip tayo ng mga masasamang bagay tungkol sa ibang tao ngunit hindi rin natin naiisip na mali ito. Sa halip na mag-isip tayo ng masasamang bagay, bakit kaya ay hindi natin ito igugol sa pag-iisip ng mga bagay na makatutulong sa sarili mo, sa iba at sa mundo. Sa ganoong paraan, ay nagagamit ang utak sa wastong paraan.
Ito na ang katotohanan, na ang lahat ng bagay ay may silbi. Maliit man o malaki, may tamang paraan ng paggamit nito. Isali na natin ang utak at bibig na mahalaga kaninuman. Gamitin natin ito ng wasto, para makatulong sa iba at sa sarili mo.
No comments:
Post a Comment